”أصابني عدم التوفيق”.. رسالة اعتذار من رامي جمال لزوجته بعد معايدته الساخرة

وجه الفنان رامي جمال، رسالة اعتذار خاصة إلى زوجته ناريمان، بعد انتشار معايدته الساخرة بعيد ميلادها عبر مواقع التواصل الاجتماعي، وهجوم بعض الجمهور عليه اذا رأوا إنها إهانة لها وليست عبارة عن سخرية .

اعتذار رامي جمال لزوجته ناريمان

ونشر رامي جمال صورة تجمعه مع زوجته عبر صفحته الشخصية بموقع تبادل الصور و الفيديوهات "إنستجرام" وعلق عليها قائلا:" آسف لو اتضايقتي يوم عيد ميلادك مني بشكل مباشر أو غير مباشر، أصابني عدم التوفيق في استخدام كلامك".

وتابع:" هزار اعتبروه البعض استهزاء أو انتقاص من أهم شخص في حياتي رغم أني عارف وواثق في تفكيرك وطبيعة حياتنا اللي بمميزاتها وعيوبها قررت أنها تكون مش للعلن".

وأضاف: "الآراء السلبية اللي شفتها واللي أنتي شفتيها لمجرد محاولتك إثبات أن كلامي عنك هو أصلا بوست ليكي قبل البوست بتاعي جدعنة منك غير مستغربة للأسف قُبلت بأنك شفتي فعلا كلام من البعض يضايق، وبما أننا عايشين مع ناس فأنا بعتذر لك عن اللي حستيه بسبب هزار عارف أنك قابلاه بس من حب ربنا فيكي ومن سوء التوفيق ليا أن الناس شافته إهانة وقررت تدافع عنك".

وانهى رامي رسالته كاتبًا:" من غير كلام كتير آسفلك وآسف للي ضايقهم الموضوع وشكرا جدا ليكي واللي فهموا قصدنا من الأول بس الدرس المستفاد أني غلطت في نشر حياتي للعلن أوعدكم مفيش كلام غير في اللي بشتغل فيه بحبك".

زوجة رامي جمال تعلق على رسالة اعتذاره

وعبرت زوجة رامي جمال عن حزنها برسالة زوجها لها، وردت عليه عبر التعليقات قائلة:"مش عارفة بتتأسف عليه وليه وبقولك تاني طريقة هزارك دي مش بتضايقني ولا هزاري معاك بيضايقك ولو بيضايق الناس فخلاص مفيش داعي يشفوه لكن هو ولا غلط ولا حاجة محتاجة اسف بالنسبة لي وأنا بحبك زي ما أنت وما حبش أن أى حاجة في الدنيا تضايقك".

معايده رامي جمال لزوجته

وكان رامي جمال عايد زوجتة بعيد ميلادها بشكل ساخرًا وكتب :"يارب أنت عارف إني اتجوزتها وهي عيد ميلادها ذكرى الزلزال القوي اللي جه مصر، والنهاردة عيد ميلادك برق ورعد وحاجة فلة.. كده عرفت أنا ليه لما غنيت سقف كورونا غزت العالم".

وتابع :" الحمد لله إننا مخلفناش، لأني واثق إن ابننا كان أكيد هيبقى المسيخ الدجال، نهاية العالم هتبقي بدايتها من بيتنا، كل سنة وأنت أول وآخر وأحلي وأرخم حاجة في حياتي، بفكر أطلقك علشان آخذ الدريسينج والحق يرجع لأصحابه".

أخر أعمال رامي جمال

ويذكر أن أخر أعمال رامي جمال الفنية، أغنية "خليكي" وهي من تلحين غريب، وتوزيع سام، وتأليف أحمد تبارك وميكساج وماستر ماهر صلاح، ومن إنتاج نجوم ريكوردز.