لميس الحديدي تنتقد دراما رمضان: ليه بنرسّخ العشوائية؟
أثارت الإعلامية لميس الحديدي جدلًا واسعًا بعد تصريحاتها الصريحة حول بعض الأعمال الدرامية التي تُعرض في موسم رمضان 2025، محذرة من تأثير هذه المسلسلات على المجتمع، رغم نجاحها الجماهيري الكبير.
في منشور على صفحتها الرسمية على فيسبوك، أعربت لميس الحديدي عن قلقها من انتشار ما وصفته بـ"العشوائية الدرامية"، قائلة:"المسلسلات الشعبية اجتاحت رمضان السنة دي.. والممثلين شاطرين جدًا، لكن ليه كله ردح وزعيق وألفاظ غريبة؟ ليه بنشوّه العامية المصرية الجميلة؟".
وأشارت لميس إلى الفرق بين تقديم الواقع بشكل فني محترف، كما فعل المخرج الكبير صلاح أبو سيف، وبين الأعمال التي تبرز أسوأ ما في المجتمع دون رسالة واضحة:"أكيد فيه ناس بتتكلم بالطريقة دي بسبب انهيار التعليم وتأثير اقتصاد التوك توك، لكن ليه بنرسخ الأسوأ؟ ليه بنعلم الأجيال الجديدة إن ده الطبيعي؟".
وعبّرت الحديدي عن مخاوفها من أن يتحول أسلوب الكلام المبالغ فيه إلى سلوك مجتمعي:"الممثل الأشطر هو اللي بيتكلم بطريقة متطرفة؟ والممثلة الأفضل هي اللي بتلوي بوزها طول الوقت؟ إحنا بنقدم إيه للأجيال اللي بتتفرج علينا؟".
وأكدت لميس الحديدي أن انتقادها للمسلسلات الشعبية لا يعني أن "فن الكمباوندات" هو الحل:"مش معنى إني ضد العشوائية إن الحل في المسلسلات اللي بتقدم حياة الطبقة الثرية بس.. الأغلبية في المجتمع ناس عادية، ليه ما نقدمش واقعهم بطريقة متزنة؟".
واختتمت لميس الحديدي حديثها برسالة تحذيرية لصنّاع الدراما:"الفن مش بس ترفيه.. هو تأثير طويل المدى.. نجاح مسلسل مش هيعوّض الضرر اللي بنسيبه في عقول الناس لو الرسالة غلط".
