نجوى فؤاد تروي تفاصيل خلافها مع لوسي.. والأخيرة تصالحها على الهواء

روت الفنانة نجوى فؤاد تفاصيل خلافاتها مع صديقتها الفنانة لوسي، وذلك خلال استضافتها في برنامج "قعدة ستات" الذي تقدمه الإعلامية مروة صبري عبر قناة ألفا.

خلاف نجوى فؤاد مع لوسي

وقالت نجوى فؤاد: "أنا ولوسي قريبين جدا من بعض، لكن حصل سوء تفاهم في موقف معين وانسحبت".

وتابعت الفنانة الكبيرة: "لما سمعت إنها تعبانة اشتريت شوية حلويات وروحت البيت عندها، والبواب قال إنهم في المستشفى، وحاولت أعرف اسم المستشفى، وفي الآخر مشيت ورجعت بعد شوية، ومساعدتها قالتلي إنها نايمة في البيت وده جرحني".

وأضافت : "كان ممكن يقولوا إنهم في البيت ونايمين وأنا أرجع وقت تاني، ومن وقتها مفيش كلام بيني وبينها، لوسي ممثلة درجة أولى، وأنا كنت زعلانة ونسيت".

لوسي تصالح نجوى فؤاد على الهواء

وفاجأت لوسي نجوى فؤاد بمداخلة هاتفية أنهت سوء التفاهم قالت فيها: "كلامك جميل، وانت ست رقيقة ومحترمة وبتحترمي الكل كبير وصغير وأنا بحترمك جدا وشيفاكي الإمبراطورة بتاعة الاستعراضات كلها، وأنا بحبك جدا".

واختتمت: "هي واثقة في نفسها وعارفة قدرها الفني في البداية، هي قالت انا لو من لوسي هقطع بدلة الرقص وأمثل وأنا قطعتها فعلا، لكن مفيش خلاف بينا ومش ممكن أزعل منها، وهي حضرت استعراضاتي كتير وعيد ميلادي وست مش ممكن تغلط في حد، لكن إحنا أهل فن وممكن نزعل، وفي الآخر نتصالح ونقابل بعض بالأحضان".