داليا البحيري تعلن إصابة زوجها بفيروس كورونا

أعلنت الفنانة داليا البحيري عن إصابة زوجها حسن سامى بـ فيروس كورونا المستجد.

وقالت داليا البحيري، خلال منشور على صفحتها بموقع "فيسبوك": "أنا حبدأ بألف حمد وشكر ليك يارب، لأن أنا عارفة ومتأكدة إن احنا عملنا اللي علينا وزيادة... حافظنا وقعدنا في البيت، وعقمنا وطهرنا، وشجبنا اللي نزل انطلق واتفسَّح... وأنا والحمد لله راضية جدا بقضاء ربنا، سبحانه وتعالى، حسن جوزي وحبيبي طلع إيجابى كورونا ڤايروس، ربنا يشفيه ويعافيه يارب".

أضافت : "إحنا كلنا عملنا مسحات... أنا والأولاد، واللي بيساعدونا في البيت؛ عشان نطمن، لأننا كنا مخالطين لحسن ... وبإذن الله نعرف النتيجة بكرة بليل... وربنا يجيب العواقب سليمة يارب".

وأكملت داليا البحيري: "أنا بقول الكلام ده ليه؟؛ عشان أي حد لازم يعمل كده، لازم يقول، وبكل وضوح، عشان الناس اللي كانت مخالطة ليهم يعرفوا، ويطمنوا على نفسهم... لأن دي أمانة... والمرض مش حاجة الواحد يخجل منها".

وتابعت: "بشكر كل اللي اتكلم يطمن على حسن وعلينا، وآسفة إن احنا مش ملاحقين نرد، عشان متكركبين، وبنشوف حنعمل إيه... دعواتكم لحسن بالشفاء العاجل، ودعواتكم لينا إننا نكون بخير، ألف شكر، وربنا يسلمكم جميعا، ويحفظكم من كل شر".