حمادة هلال: معظم مشاهد ”المداح” مستوحاة من قصص حقيقية
كشف الفنان حمادة هلال عن كواليس مسلسل "المداح" بأجزائه المختلفة، وذلك خلال حواره مع الإعلامية فاطمة مصطفى في برنامج الراديو بيضحك الذي يُبث عبر الراديو 9090.
وقال حمادة هلال: "حصلت فعلًا أحداث غريبة في المداح الجزء الثاني واحنا كنا مزودينها على نفسنا، كنا بنصور في مرسي علم في حته صعبة أوي و ببيوت مهجورة بقالها سنين ولما البحر بيعلى في منطقة القصير أصواته بتكون صعبة جدًا".
وتابع: "واليوم دا كان في برق وشجر والبيت فوق فيه حديد، وفي مشهد كنت برقي أحمد عبد العزيز فجأة لقيت البيت بيترعش والسرير بيترج فانا سألت أستاذ أحمد دا تمثيل ولا انت فيك حاجة قالي انا مهزتش حاجه وفي الآخر ركزنا وخرجنا برا البيت لقينا الجو صعب جدا ومش عارفين نقف".
وأضاف: "حادثة السيدة اللي أكلت ابنها حقيقية والناس شافتها بجد وقالت إنها كانت حاسه إن حد بيقولها رجعيه بطنك انتِ كده بتحميه، وحمزة العيلي في شخصية موت دي حقيقية من الشخص اللي قتل 13 واحد وقال إنه مش في وعيه وحد بيقوله اعمل كده".
و عن كواليس المشهد ، أوضح: "تصوير المشهد كان صعب جدًا ومكنتش عارف اقف قدام النار، لكن المكتوب كان أصعب جدا، واكتشفت بعد المسلسل إن الناس بتحب الرعب أوي والأحداث التقيلة اللي مبقدرش اقراها اكتشفت حب الناس ليها لكن حاولنا نخفف المشاهد عشان متبقاش صعبة، والمخرج عشان يقنعني بالمشهد قال لي انت بتحميها من اللي حواليها وبترجعيها مكانها الاساسي".
أبطال مسلسل المداح
مسلسل "المداح - أسطورة العودة" بطولة حمادة هلال، فتحي عبدالوهاب، هبة مجدي، دنيا عبد العزيز، خالد سرحان، محمد عز، حنان سليمان، تامر شلتوت، صبحي خليل، سهر الصايغ، مي سليم، دياب، حمزة العيلي، تأليف أمين جمال، وليد أبو المجد، شريف يسري، إنتاج "سيدرز آرت برودكشن – صباح إخوان"، إخراج أحمد سمير فرج، ويعرض الساعة 8 مساء على قناة mbc مصر.
