يسرا : عادل إمام وقف معايا في كل أزمة مريت بيها في حياتي

تحدثت الفنانة يسرا عن مواقف لا تنساها أبدًا للزعيم عادل إمام، وذلك خلال حوارها مع الإعلامي عمرو أديب في برنامج "بيج تايم بودكاست" المذاع عبر قناة MBC.

وقالت يسرا: "عادل إمام في كل أزمة أنا مريت بيها في حياتي كان واقف معايا، مرة مكنش حد عارف مكنش عندي فلوس، كنت بشتغل لكن وقتها الفلوس مكنتش كتيرة، كان عندي عربية مرسيدس قولت أبيعها لحد ما ربنا يفرجها، لقيته جالي البيت بيسألني عايزة أبيع عربيتي ليه؟ سألته إزاي عرف؟ والكلام ده كان من 35 سنة".

وأضافت : "رديت عليه إني معنديش فلوس، قالي لأ متبعيش العربية، وخطط أن يكون في فيلم أشارك فيه وقالي أطلبي اللي إنتي عايزه".

وتابعت: "مرة كنت تعبانة جدا وبموت عملت عملية استمرت 6 ساعات والهيموجلوبين وصل لـ5، اتصل بيا وقالي أنه سمع إني تعبانه قلت له متجيش مش هتستحمل تشوفني، بس هو متابع وعارف كل حاجة".

وواصلت حديثها عن مواقف الزعيم معها، قائلة: "عادل إمام عمره ما بيقفل المسرح، لكن في مرة حصلي حادثة كان لازم أخرج منها ميتة، كان وقتها بيقدم مسرحية من إخراج الأستاذ شريف عرفة، بمجرد ما عرف ختم المسرح وهو وشريف عرفة وعزت أبو عوف كانوا موجودين في لحظتها".

واتمت: "عادل إمام مش بس أستاذ فن هو أب وصديق عظيم، وعنده تقييم للبني آدمين مخيف، اللي ميبحوش من النظرة الأولى يفهمه".

يذكر أن أخر أعمال يسرا مسلسل “روز وليلى” وشاركها البطولة نيللي كريم، أحمد وفيق، تيام قمر، رغد الفيصل، هشام عاشور، عارفة عبد الرسول، وظهور خاص للنجمة أمل رزق، ابراهيم السمان، حسن أبو الروس، مروان يونس، محمد ناصر، فادي خفاجة، ولأول مرة محمد سالم، وآخرين. وضع الموسيقى التصويرية عمرو اسماعيل.